Ito ang ikalawang tula ko na ginamit sa proyektong Tulaan sa Tren. Ang nagrekord naman nito ay ang young star na si Matt Evans.
Kung hindi ako nagkakamali ay nasa kolehiyo pa ako nang sulatin ko ito, bandang 1963 o 1964. Ang Pateros noon ay isa pang munisipalidad sa probinsiya ng Rizal. Ngayon ay bahagi na ito ng Metro Manila, at hindi mo na makikita ang Ilog Pateros sa kakapalan ng waterlily na tumatakip sa tubig. (Ako naman, natuto ring lumangoy--noong may asawa't anak na ako. Sa dagat at swimming pool na ako natuto.)
AWIT SA ILOG PATEROS
Tagailog ay di natutong lumangoy:
sa hiya’y matinis itong aking taghoy.
O Ilog Pateros, agos na marahan,
ang paliwanag ko ay iyong pakinggan.
Oo, kung umagang bagong gising tayo,
ginto kang gayuma sa mga tulad ko,
at sa hapon naman, paghimlay ng araw,
ang lambong mo’y pilak na nakasisilaw.
Pero sa pagitan ng umaga’t gabi,
ano ang iyong maipagmamalaki?
Putik kang malapot, tahanan ng suso,
lubluban ng kalabaw, tinta ka’t tanso.
Waterliling ugat ay makutong buhok,
bituka’t atay ng dagang nabubulok,
naglalahong bula ng sabong panlaba,
tae ng tao at tambak na basura--
ito at iba pa, O Ilog Pateros,
ay dalang lagi ng marahan mong agos.
At akong bata pa’y masyadong pihikan,
aasahan bang matuto ng languyan?
-- Jose F. Lacaba
Tulad ng tulang “Ang mga Kagila-gilalas na Pakikipagsapalaran ni Juan de la Cruz,” ito’y unang nalathala sa kalipunang Mga Kagila-gilalas na Pakikipagsapalaran: Mga Tulang Nahalungkat sa Bukbuking Baul (Kabbala, 1979; ikalawang edisyon, Office of Research and Publications, Ateneo de Manila University, 1996). Muli rin itong nalathala sa kalipunang Kung Baga sa Bigas: Mga Piling Tula (University of the Philippines Press, unang limbag, 2002; ikalawang limbag, 2005).
Saturday, October 11, 2008
Subscribe to:
Post Comments (Atom)
7 comments:
what do you know, you're on blogger too sir! hehe regards. :) - julie
wow..so you're jose lacaba..
hehe..yung tula mo po nsa first chapter ng book nmin sa pluma and we're currently studying it right now. Awesome job:)
Cool:
Aling tula? Anong book? Ano ba ang pluma? Anong year ka na ba? High school o college?
Jose F. Lacaba
hi po..gudeve..cool,who are you?hehe..like co0l said,pinagaaralan dn po namin ang iy0ng tula na awit sa ilog pateros..sa pluma 3..third yr high sch0ol po..1st chapter dn po..ehe..ang lalim po ng p0em..phew!n0sebleed! -mj..
hey we have a mastery test about sa mga tula and magrerecite kami nito so if kung pwede lang poh give me style sa pagbasa ng tula niu if you could record well then its good to hear the original voice of jose f lacaba at ipaparinig ko ito sa mga kaklase ko :) kung paanu ka bumasa hehe salamat poh ang iyong tula ay nasa pluma po namin na 3rd year pluma ,, at napili kong tula ay yung ilog pateros haha at irerecite ko toh this week so hope for reply ! thank you
Anonymous:
Ang lalim ba? Akala ko pa naman, simpleng-simple: hindi ako natutong lumangoy noong bata ako dahil ang dumi ng ilog sa likod-bahay namin.
Kirk:
Me ginawang recording nito ang National Book Development Board, hindi ko lang maalala kung ang nagbasa ay si Romnick Sarmenta o si Matt Evans. Pinatugtog ang recording sa LRT na biyaheng Marikina-Divisoria, ewan ko lang kung hanggang ngayon. Anyway, basahin mo lang na para kang nagbabalagtasan sa first stanza, pero pagkatapos ay gawin mo nang medyo conversational.
Julie:
Regards din. Long time no see. Sori, super late itong reply.
Kirk:
Si Matt Evans pala ang nagbasa at nagrekord para sa Tulaan sa Tren. Hindi ko naisipang rebyuhin muna ang ginawa kong intro sa blog bago kita sinagot. Ang mala-balagtasang estilo ay dapat pala sa first 2 stanzas, hindi sa first stanza lang. Ayos ba?
Post a Comment